ДАГЪУСТАН РЕСПУБЛИКАДИН ГЬУКУМАТДИН СЕРЕНЖЕМ

2023-йисан 26-декабрь, №694. Магьачкъала шегьер

2024-йисуз Дагъустандин халкьдин шаир СтIал Сулейман дидедиз хьайи 155 йисан юбилейдиз гьазурвилер акун ва юбилей тухун патал агаъадихъ галай месэлаяр гьял авун:

1. Дагъустандин халкьдин шаир СтIал Сулейманан 155 йисан юбилейдиз гьазурвилер акун ва юбилей кьиле тухун патал кIвалахдай группа туькIуьрун ва адак вужар акатзаватIа тестикьарун.

2. КIвалахдай группади 2024-йисуз СтIал Сулейманан 155 йисан юбилейдиз гьазурвилер акунихъ ва ам тухунихъ галаз алакъалу тир тедбиррин план гьазурун ва тестикьарун.

3. Дагъустан Республикадин районрин чкадин кIвалахар тухузвай идарайриз ва шегьеррин округриз Дагъустандин халкьдин шаир СтIал Сулейманан яратмишунар теблигъ авунин крар кьиле тухун теклифун.

СтIал Сулейман

ТАПАН КОММУНИСТ

Инсанарин бязибуруз

КIанзавач инсанвал ийиз.

Гафар пара ширин къалуз,

Фикир туш хъсанвал ийиз.

Фагьумна за бязибур.

Кепекдихъ маса гуз абур,

Вичи вич кьаз лап такабур,

КIанзава уьзденвал ийиз.

Дамах жеда бязибурук,

Ажуз кесиб кутаз хурук,

ГьакI кутаз масад къурхудик,

Падишагь, султанвал ийиз.

Чидач инсанвилин къайда,

Уьмуьр ракъуз гьакI гьавайда.

Калхуз юлдашрин арада

ГатIунна шейтIанвал ийиз.

Юзуриз гагь-гагь пIузарар,

КIуф хъуьрез, экъисиз сарар,

Ажузбуруз гуз кичIерар,

Вичи гьакI уфтанвал ийиз.

Вич хинни яз, гъуьр хьиз акваз,

Яргъалай фекъир хьиз акваз,

Вич са умун къуьр хьиз акваз,

Чинеба «асланвал» ийиз.

Гафар пара ширин къалуз,

Ришвет къачуз, руфун дулуз,

ТIвар вичин партийный лугьуз,

Куьгьне Мурсал-ханвал ийиз.

Эй Сулейман, са-сад, са-сад,

Кьулухъ тамир абрукай мад.

Регъуьн тавур къуьлуьн шагьад

Къачуз, регъуьхъбанвал ийиз.