Хьана кьван, хьанач кьван чIехи элкъвей вилер авай са акьуллу тIиб. Йифиз адан цIарцIар гузвай вилериз килигай касдик кичIела зурзун акатдай.

Юкъуз тIиб садазни аквадачир, ам таран хъалхъамда вичиз чка авуна ксудай, йиф алукьайла гъуьрчез фидай.  

Садавни кар жедачир типIрен. Ингье инсанриз адакай гзаф кичIедай. ТипIрен ван атайла дакIарар кIевдай, чизвай дуьаяр рикIел хкидай. «ТипIре хъийирдихъ гьарайдач» лугьуз, садбуру тIвал кьуна ам чпин саларай чукурдай.

«Яраб инсанриз закай вучиз икьван хъел аватIа?» – лугьуз фикирдай типIре. Гъамуни адан вилер генани чIулав, ван генани хци ийидай. Инсанри типIре чпиз гуз-вай кьван хийирдикай фикирдачир. Ада кьифер, пепеяр, азарлу гъвечIи гьашаратар нез тIебиатдиз куьмек гузвайдан гъавурда акьазвачир абур. Гьар гъилера тIиб акурла адакай катиз, чуьнуьх жез алахъдай вирибур.

Хуьряй акъатна физни кIанзвачир типIрез. Вучиз лагьайтIа и чкаяр гьадан кIвални тир.

Садра рагъданихъ тIиб хуьруьн са багъда тарцин пешерин арада ацукьнавай.  Ада цIийиз кьунвай кьиф иштагьдивди незвай.  Вич ацукьнавай хилелай адаз са дидеди айвандал аял авай кьеб гьикI эчягъзаватIа акуна. Дидедин верцIи лайлаяр ван къвез тIиб ахвариз физвай.

Са герендилай диде вични ахвариз фена. МичIи жезвай. Садлагьана типIрен япарихъ ванер галукьна. Аял авай кьепинив агатзавай гъуьлягъ акурла типIре вичин хци ванцив акI гьарайна хьи, ксанвай диде цIай илисайди хьиз чкадилай хкадар хьана. Ингье адаз кьепIинин кIаник чуьнуьх хьанвай

гъуьлягъ ваъ, вичин кьилелай луварар гьалчиз элкъвезвай тIиб акуна. Гъиле гьатай кул кьуна алахъна ам тIиб ягъаз. Гьарай-эверик кIвалинвияр кIватI хьана. Гьарада са тIвал кьуна гьавалат хьана типIрел. ТIиб лагьайтIа, абурукай кичIе тахьана гъуьлягъ кьаз кIанз кьепинилай элкъвезвай. Вири сад-садак акахьнавай ина: типIрез сеперарзавай инсанар, шехьзавай аял, рикIин кьил атIудайвал гьарайзавай тIиб. Инсанрин кьил типIрехъ акахьнаваз акур гъуьлягъ вичин яргъи мез экъисна кьепинай виниз акьахзавай. Им акур типIре вич цавай къван хьиз вегьена, гъуьлягъдин тумуникай кьуна, лув гана цавуз акъудна. Садлагана вири кис хьана, гафар виридан туьтуьна амукьна. 

Гила абуру вирида типIрез са масакIа килигзавай. ТипIрехъай писвал къведа лугьузвай инсанриз регъуь хьанвай.

Дидедиз вичин аял гъуьлягъдин саракай хкудай типIрез хъсанвал ийиз кIан хьана. Ада типIрез вичин багъда, дакIардай аквазвай машмашдин тара иер са муг туькIуьрна. ТIиб хизандиз пара кIан хьанвай. Фад-фад адан муказ недай затIар вегьизвай абуру. Няни хьайила хизан багъда, таран кIаник кIватI жедай. ТIиб лагьайтIа, элкъвей вилер экъисна, кьил инихъанихъ элкъуьриз са хилел ацукьдай. ТипIрен ванци, адан акунри садазни кичIевал гъизмачир. Адан вилера гъамуни ваъ, хвешивили чка кьунвай.

Гьа икI, типIре акунралди ваъ, краралди къушариз къимет гуз чирна инсанриз.