Магьачкъалада акъатзавай «Лезги газет» «Самур» газетдин кlвалахдарриз бубадин кlвал хьиз кlани я. Адал кьил чlугун тавурла са вуч ятlани квадарайди хьиз жеда чаз. Лезги халкьдин рикlи ина ягъизва лугьуз жеда. Дагъустандин медениятда хъсанвилихъ кьиле физвай вакъиайрикайни цlийивилерикай гьар жуьредин шад хабарар ина ван жеда. Чи тlвар-ван авай къелемэгьлиярни и редакцияда гьалтда вал. Газетдин кlвалахдаррихъ галаз лезги чlалакай марагълу ихтилатрал илигун гьар гъилера чи рикlяй жеда.
Рагьметлу Агъариза Саидов редактор тир чlаварилай икl хьанва. Вуч хъсан я хьи, са береда чи газетдин чlехи дуст тир и камалэгьлиди кутур баркаллу рехъ жегьил къелемэгьли, шаир-журналист Мегьамед Ибрагьимова лайихлудаказ давамарзава. Бакудинни Магьачкъаладин журналистрин арада авай яратмишунрин муьгъ къвердавай генани мягькемди жезва. Гьавиляй завай и гъилерани коллектив такуна Бакудиз хквез хьанач. Алатай йисан 26-декабрдиз Магьачкъалада кьиле фейи зи юбилейдин мярекатда иштирак авун патал атанвай «Сувар» ансамблдин солистар Жавагьир Абдулова, Решад Ибрагьимов, Эльвина Гьейдарова ва Агьмед Къурбановни захъ галаз санал алай.
Пандемиядилай гуьгъуьниз редакцияда сифте яз хьайи зун инин акунри рикlивай шадарна. Цlийи кьилелай туькlуьрнавай кабинетрин салагъади, цларай куьрсарнавай чи этнографиядиз талукь шикилри рикl ахъайзавай. Редакцияда арадиз гъанвай тарихдин музейди лагьайтlа, захъ лувар кутуна.
Мугьманар хушдаказ кьабулай газетдин кьилин редактор, Дагъустандин Журналистрин Кlватlалдин кьил Мегьамед Ибрагьимовахъ ва адан заместитель Куругъли Ферзалиевахъ галаз редакцияда кьиле фейи ихтилатар рикlелай тефидайбур хьана. Вичихъ зурба алакьунар авай жегьил шаир-журналист Мегьамед Ибрагьимова газет кlвачел акьалдарун, адав генани гзаф кlелдайбур агудун патал ийизвай алахъунри, мектебра тухузвай чlалаз талукьарнавай олимпиадайри, диктантри, интернетдай гузвай чlалан тарсари, коллектив патал туькlуьрнавай къулайвилери чи рикl ачухарна. Редактордин эрчlи гъил тир тlвар-ван авай къелемэгьли Куругъли Ферзалиева ва коллективдин муькуь журналистрини адаз мукьувай куьмек гузва. Газетдихъ икьван рикl кузвай кьегьалралди а юкъуз чна мад гъилера дамахна.
Эхь, эхиримжи вахтара Дагъустанда ва къеце патан уьлквейра лезги чlал жегьил несилдиз кlанарун, ам вилик тухун патал «Лезги газетдин» редакцияди кьиле тухузвай кlвалахар руьгь кутадайбур я.
Чун редакциядай гзаф савкьватар гваз хтана. Абур чи къелемдин дустари эхиримжи вахтара лезги чlалал чапдай акъуднавай ктабар я. Идалай чlехи савкьват женни? Чна чка атунивай «Самурдин» кlелдайбур а ктабрихъ галаз танишарда.
