1. -Ци, -цIи, -чи, -чIи эхирар /в/, /й/, /л/, /н/, /р/ сесералди акьалтзавай са гьижадин гафариз, существительнийриз, гьабурун кьиле авай ачух тушир сесерив кьадайвал къведа. Месела: цен – ценци; цIар – цIарцIи; чар – чарчи; чIар – чIарчIи; тар – тарци; кIар – кIарци; тIвар – тIварцIи.

2. Къакъатунин I падежда -яй эхир анжах чпин секинвилин падежда -э(е) авай гафара кхьида. Месела: гъиле – гъиляй; гьуьле – гьуьляй; тарце – тарцяй; чIарчIе – чIарчIяй ва мсб.

3. Актив падеждин эхир гафунин дибда авай ачухдалай гьамиша аслу жезвач. (а – а; и – и; у – у; е – е; уь – уь). Месела: вацI – вацIу; кьун – кьуна; кьин (клятва) – кьине; регъ – регъуь.

4. Актив падеж асул падеждин бинедаллаз арадиз къведа. Амма ахьтин гафар ава хьи, и къайдадиз табий туш. Месела: «цIай» актив падежда «цIу» жеда. ГьакIни «зун» тIварцIиэвез актив падежда «за» жеда.