Алай йисан 23-февралдиз Дагъустан Республикадин Мегьарамдхуьруьн райондин Ярагъ Къазмаяр хуьруьн «Лезгинка» суваррин кlвале «Лезги чlални меденият хуьнин рекьер» тlвар алай мярекат кьиле фена. Агъадихъ чна гьа мярекатдиз «Самур» газетдин редакциядин коллективди ракъурай тебрикдин чар гузва.
«Лезги чlални меденият хуьнин рекьер» тlвар алаз Дагъустан Республикадин дережадин межлис кьиле фида лагьай хабарди чаз гзафни-гзаф хвеши авуна. Им руьгь кутадай, рикlер шад гьиссерив ацlурдай хабар я. Им акl лагьай чlал я хьи, Дагъустандин вилик-кьилик квай лезгийри, чи камалэгьлийри дидед чlалан таъсиб чlугвазва, адан гележегдикай фагьумзава, хайи чlал хуьнин, ам шегьредиз акъудунин рекьерихъ гелкъвезва, лезги чlалакай гьукуматдин дережада веревирдер ийизва.
Гьайиф хьи, девирдин четинвилер, кlевирнавай часпарар себеб яз чавай а мярекатдиз къвез жезвач. Ятlани чи рикl гьана ава. Масакlа хьунни мумкин туш. Дагъустандинни Азербайжандин лезгияр са лекьрен кьве лувар я. Виш йисар я чи тlалар-квалар хьиз шадвилерни сад яз. Къе Кьулан вацlун и патани а пата авай чи халкьдин виридалайни кар алай месэла дидед чlал хуьн, ам гележег несилрал агакьарун я. Им чи хиве авай виридалайни чlехи жавабдарвал я.
Чи чlехи бубайрини дидейри дидед чlал чаз кlанарна, ам вилин нинеяр хьиз хуьз туна. Бес чалай и аманат чи веледрал агакьариз алакьзавани? Чи хтулриз багьа яни хайи чlал? Абур чпин хизанра рахазвани дидед чlалал? Рахазвачтlа, тахсир чал ала. Чlал амачтlа, халкьни амач лагьай чlал я.
Халкьдикай халкь ийизвайди адан чlал я. Ам квадарун дуьньядин халкьарин жергедикай хкатун, руьгь квадарун, жуввал квадарун лагьай чlал я. Ихьтин кьадар-кьисмет чи кьилел татуй лугьуз чун датlана санал чlал хуьнин рекьерихъ гелкъвена кlанзава.
Гьавиляй и межлис чlал хуьнин рекье зурба мярекатдиз элкъуьн чи мурад я.
Куьне чlалаз талукьарнавай и мярекат халкьдин мелез, халисан лезги мелез элкъуьрай. Жуван са шиирда лагьанвайвал:
Са чlехи мел кlанда чаз,
Са кьилин мел, лезги мел.
Агатдайвал чи чlалав
Кьиляй-кьилиз вири эл.
Мярекатдик экечlнавай, хайи чlалал рикl алай, ам багьаз кьазвай вахар, стхаяр, чан жуванбур! Квез агалкьунар хьурай!
